www.interviewstreet.com საიტზე მორიგი CodeSprint შეჯიბრება გაიმართა. შეგახსენებთ, რომ interview street-ს სხვადასხვა კომპანიები დეველოპერების საპოვნელად იყენებენ. შეჯიბრებებში ხშირად ამ კომპანიების real-world პრობლემებია გადასაჭრელი და არა მხოლოდ მათემატიკური ან კლასიკური ალგორთმების შემცველი ამოცანები.

აღნიშნულ საიტზე სხვადასხვა ორგანიზაციის ინიციატივით პერიოდულად ტარდება შეჯიბრება, ხოლო ამოცანები ისევ ხელმისაწვდომი რჩება. მსურველებს შეუძლიათ ივარჯიშონ და ამოხსნები გაგზავნონ. CodeSprint ერთ-ერთი შეჯიბრებაა, რომელშიც როგორც წესი, რამდენიმე კომპანიაა ხოლმე ჩართული. მაგალითად, CodeSprint 3-ის სპონსორებს შორის იყვნენ Quora, Palantir, Pocket Gems, Box, Academia.edu.

1600 მონაწილეს შორის ერთ-ერთი მათგანი საქართველოდან იყო. ელდარ ბოგდანოვმა (gojira) პირველი ადგილი რამდენიმე მონაწილესთან გაინაწილა (სრული შედეგები ამ ბმულზეა, თუმცა სანახავად საიტზე ავტორიზაციაა საჭირო).

რამდენიმე დღის წინ მან მაღალი შედეგი აჩვენა TopCoder-ის 558 SRM-ზეც. ამ რაუნდში არა ერთ ჩემპიონს გადაუსწრო და მეათე ადგილზე გავიდა, რის შედეგადაც მისმა რეიტინგმა კვლავ მკვეთრად აიწია.

ელდარ ბოგდანოვი ამჟამად თბილისის სახელმწიფო უნივერსიტეტის საოლიმპიადო გუნდების მწვრთნელია. თუ ამ უნივერსიტეტში სწავლობთ, ამოცანებს ხსნით და სურვილი გაქვთ უნივერსიტეტის გუნდებში ჩაერთოთ, შეგიძლიათ მას დაუკავშირდეთ.