სერია "GeOlymp Series 2013" ხუთი ონლაინ-რაუნდისგან და დასწრებული ფინალისგან შედგება. მასში მონაწილეობის მიღება ნებისმიერ ქართველ სკოლის მოსწავლეს და სტუდენტს შეუძლია, სხვა მსურველები კონკურსგარეშე დაიშვებიან. ოლიმპიადა ინდივიდუალურ რეჟიმში ტარდება, ანუ მონაწილეს მიერ დახმარების მიღება სხვა პიროვნებებისგან ნებისმიერ ეტაპზე წესების დარღვევად ითვლება.

ონლაინ-რაუნდები
ონლაინ-რაუნდი 2-საათიან შეჯიბრს წარმოადგენს, რომელზეც მონაწილეებს 5 განსხვავებული სირთულის ამოცანას შესთავაზებენ. რაუნდის თარიღის შესახებ ინფორმაცია საიტზე გამოქვეყნდება არაუგვიანეს 1 კვირით ადრე ამ რაუნდის ჩატარებამდე. ასევე ეს ინფორმაცია დარეგისტრირებულ მონაწილეებს მითითებულ ელექტრონული ფოსტის მისამართებზე გაეგზავნებათ.

იმ შემთხვევაში, თუ სერიის მსვლელობის პროცესში მოხდება წესების ცვლილება, ისინი აუცილებლად იქნება ასახული საიტზე რაუნდის თარიღის გამოქვეყნებისთანავე.

ყოველ რაუნდში მონაწილეების რანჟირება მოხდება დაგროვებული ქულების რაოდენობით. ყოველი ამოცანის ამოხსნისთვის მონაწილეს 1 ქულა ემატება. ამოცანა მონაწილეს ამოხსნილად ეთვლება, თუ მან გააგზავნა ამ ამოცანის ამოხსნა, რომელმაც სერვერზე ყველა შემოთავაზებულ ტესტზე სწორი პასუხი გამოიტანა მითითებულ დროის შუალედში. თუ რამდენიმე მონაწილემ ტოლი რაოდენობის ამოცანა ამოხსნა, მათი რანჟირება ჯამური საჯარიმო დროით ხდება. ჯამური საჯარიმო დრო არის ყოველი ამოხსნილი ამოცანის საჯარიმო დროების ჯამი. ამოხსნილი ამოცანის საჯარიმო დრო არის დრო, გასული ოლიმპიადის დაწყებიდან ამ ამოცანაზე სწორი ამოხსნის გაგზავნამდე, პლიუს 20 წუთი ყოველი არასწორი გაგზავნისთვის ამ ამოცანაზე, რომელიც წინ უძღვებოდა პირველ სწორ გაგზავნას.

ყოველი რაუნდის შემდეგ მოხდება მისი შედეგების გამოქვეყნება ოთხ ნომინაციაში: მოსწავლეთა, სტუდენტთა, საკონკურსო (რომელიც ორივეს აერთიანებს) და საერთო (კონკურსგარეშე მონაწილეების გათვალისწინებით). რაუნდის შედეგები საბოლოოდ ჩაითვლება ამ რაუნდის შემდეგ 72 საათის გასვლის შემდეგ. ამ პერიოდში ჟიური იტოვებს უფლებას, მოახდინოს არასპორტულ ქცევაში შემჩნეული მონაწილეების დისკვალიფიკაცია. არასპორტულ ქცევად აღიქმება როგორც სხვა პიროვნებისგან დახმარების მიღება (სხვისი კოდის ან მისი მოდიფიკაციის გაგზავნა, ამოხსნის გზაზე მსჯელობა), ასევე ისეთი ქმედებების ჩადენა, რომლებმაც შეიძლება სერვერის მუშაობის შეფერხება ან შეწყვეტა გამოიწვიონ. დისკვალიფიკაცია მთელი სერიის მანძილზე იმოქმედებს.

რაუნდის დასრულების შემდეგ თითოეული მონაწილესთვის ითვლება მისი რეიტინგი ამ რაუნდში ნაჩვენები შედეგის საფუძველზე. რეიტინგები გამოითვლება ოთხ ნომინაციაში: საერთო, საკონკურსო, მოსწავლეთა და სტუდენტთა. რეიტინგი შემდეგი ფორმულით ითვლება:

Rating_contestant = 100 * Solved_by_contestant / Solved_by_winner * (N_contestants-1) 
                    / (N_contestants + Contestant_place - 2)

სადაც Solved_by_contestant არის მონაწილეს მიერ ამოხსნილი ამოცანების რაოდენობა, Solved_by_winner არის გამარჯვებულის მიერ ამხოსნილი ამოცანების რაოდენობა, N_contestants არის რაუნდის მონაწილეთა საერთო რაოდენობა და Contestant_place არის მონაწილეს მიერ რაუნდში დაკავებული ადგილი. მათ, ვისაც რაუნდში მონაწილეობა არ მიუღია, ამ რაუნდის რეიტინგი 0–ის ტოლად ეთვლებათ. მონაწილეების დისკვალიფიკაციის შემთხვევაში მოხდება რეიტინგის გადათვლა ამ მონაწილეების შედეგის ჩაუთვლელად. მოსწავლეების და სტუდენტების ნომინაციებში რეიტინგი ითვლება შესაბამისი მონაწილეების ერთმანეთის მიმართ ნაჩვენებ შედეგზე დაყრდნობით.

შედეგების შეჯამება და ფინალი
საერთო ჩათვლაში მონაწილეების რანჟირება მოხდება მათი ჯამური რეიტინგის მიხედვით. ჯამური რეიტინგი არის მონაწილეს მიერ სერიის მანძილზე ნაჩვენები 4 საუკეთესო რეიტინგის ჯამი. ჯამური რეიტინგი დაითვლება ოთხ ნომინაციაში: საერთო, საკონკურსო, მოსწავლეთა და სტუდენტთა. სერიის ფინალში დაპატიჟებული იქნება არანაკლებ 16 მონაწილე, რომლებიც საკონკურსო ჩათვლაში გაიმარჯვებენ.

ფინალი წარმოადგენს ინდივიდუალურ 4-საათიან შეჯიბრს. ფინალის ამოცანების კრებული 8-10 ამოცანისგან შედგება, შეჯიბრი სტანდარტულ ACM ფორმატში ჩატარდება.