კვირას, 27 ნოემბერს, ჩატარდება სტუდენტური მსოფლიო ჩემპიონატის ჩვენი რეგიონის ნახევარფინალი (NEERC - North Eastern European Regional Contest). ღონისძიება გაიმართება საქართველოს ტექნიკური უნივერსიტეტის პირველ კორპუსში 10 საათზე. სატესტო ტური დაგეგმილია შაბათს 18 საათზე.

ოლიმპიადაში მონაწილეობას მიიღებენ შემდეგი ქართული უმაღლესი სასწავლებლის გუნდები:

თბილისის სახელმწიფო უნივერსიტეტი (Tbilisi SU)
თავისუფალი უნივერსიტეტი (FreeUni)
შავი ზღვის საერთაშორისო უნივერსიტეტი (Tbilisi IBSU)
საქართველოს ტექნიკური უნივერსიტეტი (Georgian TU)
ქართულ-ფრანგული ინსტიტუტი (Tbilisi SU Geo-French)
წმიდა ანდრია პირველწოდებულის სახელობის ქართული უნივერსიტეტი (Tbilisi SANGU)
აკაკი წერეთლის სახელმწიფო უნივერსიტეტი (Kutaisi ATSU)
ბათუმის სახელმწიფო უნივერსიტეტი (Batumi SU)
სოხუმის სახელმწიფო უნივერსიტეტი (Sokhumi SU)

ასევე იასპარეზებენ გუნდები სომხეთის და აზერბაიჯანის უნივერსიტეტებიდან:

Russian-Armenian (Slavonick) State University (RAU)
State Engineering University of Armenia (SEUA)
American University of Armenia (American U of Armenia)
Yerevan State University of Architecture and Construction (YSUAC)
Yerevan State University (Yerevan SU)
Gyumri State Pedagogical Institute (GSPI)
Qafqaz University (Baku Qafqaz U)
Baku State University (Baku SU)
Moscow State University (BakuMSU)

შეგახსენებთ, რომ ACM ICPC-ში ქართველთა მონაწილეობის ისტორიაში ფინალში ერთადერთხელ იყო გასული ქართული გუნდი - თსუ-ს ”ტრიუმვირატი”. 2009 წელს გუნდის წევრებმა ბრინჯაოს მედლები მოიპოვეს. წელს ფინალური რაუნდისთვის განსაკუთრებით ემზადება თსუ-ს გუნდი ”ბრონტოზავრი” შემადგენლობით: ელდარ ბოგდანოვი, ირაკლი მერაბიშვილი, ლევან ვარამაშვილი. ვუსურვოთ მათ წარმატებები :)

ნახევარფინალის პარალელურად ამავე ოლიმპიადაზე ჩატარდება სამხრეთ კავკასიის ღია ჩემპიონატი.

29 ოქტომბერს ჩატარდა ACM-ის მიერ დაფუძნებული International Collegiate Programming Challenge ჩემპიონატის მეოთხედფინალი. ეს შეჯიბრი წარმოადგენს პროგრამირებაში მსოფლიოს ჩემპიონატს უმაღლეს სასწავლებლებს შორის. მეოთხედფინალიდან დაწინაურებული გუნდები 27 ნოემბერს მონაწილეობას მიიღებენ ჩემპიონატის ნახევარფინალში. ACM ICPC-ის ფინალი 2012 წლის მაისში პოლონეთში გაიმართება.

მეოთხედფინალი დამოუკიდებლად მიმდინარეობდა სხვადასხვა რეგიონებში. ჩვენს ქვეყანაში ის წმიდა ანდრია პირველწოდებულის სახელობის ქართულ უნივერსიტეტსა და ბათუმის შოთა რუსთაველის სახელობის სახელმწიფო უნივერსიტეტში ჩატარდა და მასში ცხრა უმაღლესი სასწავლებელის 31 გუნდმა მიიღო მონაწილეობა:

ორგანიზატორების ცნობით, მეოთხედფინალის შედეგებით ნახევარფინალში დაიშვება ყოველი უმაღლესიდან არაუმეტეს 3 საუკეთესო გუნდის. ერთადერთ გამონაკლისს წარმოადგენს თბილისის სახელმწიფო უნივერსიტეტი, რომელიც თავისი ბოლო წლების მაღალი შედეგების დამსახურებით 4 გუნდით იქნება წარმოდგენილი.

მეოთხედფინალში პირველ ადგილზე 9 ამოხსნილი ამოცანით გავიდა Tbilisi SU #1 Brontozavri (ელდარ ბოგდანოვი, ირაკლი მერაბიშვილი, ლევან ვარამაშვილი, მწვრთნელი გიორგი საღინაძე).
მეორე ადგილი დაიკავა გუნდმა Tbilisi SU #2 Scadoosh 6 ამოცანით (ნიკა გაბისონია, ელენე ლაცოშვილი, გიორგი მეგრელი, მწვრთნელი ელდარ ბოგდანოვი)
მესამე ადგილი 6 ამოცანით - FreeUni ADA (ხატია ჭითაშვილი, მარიამ დანელია, დათა ლაპიაშვილი, მწვრთნელი ელდარ ბოგდანოვი)

სრული შედეგები შეგიძლიათ იხილოთ ამ ბმულზე.

შეჯიბრის ამოცანების პირობების სანახავად მიყევით ბმულს, ხოლო ამ ამოცანების გარჩევებს უახლოეს მომავალში შემოგთავაზებთ ჯეოლიმპის საიტზე.

რუსეთის ქალაქ ნოვოსიბირსკში ყოველწიურად ტარდება ღია სტუდენტური ოლიმპიადა, რომელსაც ნოვოსიბირსკის ინსტიტუტი უწევს ორგანიზებას. შეჯიბრის მხარდამჭერებს შორის არიან Microsoft, HP და Samsung კომპანიები.

ქართველი მონაწილეებისგან შემდგარი გუნდები ყოველ წელს მნიშვნელოვან შედეგს აღწევენ და სტაბილურად გადიან ამ შეჯიბრების ფინალში. წელს, ოქტომბრის დასაწყისში დაიწყო ციმბირის XII ღია ოლიმპიადა. მისი პირველი ტური შესარჩევი რაუნდი იყო და ინტერნეტით ჩატარდა. გუნდები, რომელთაც 8 ამოცანაზე მეტი ამოხსნეს, ფინალში მონაწილეობისთვის მიიწვიეს. ინტერნეტ რაუნდის შედეგები ამ ბმულზე შეგიძლიათ იხილოთ.

შეჯიბრში ასპარეზობდნენ ქართული გუნდებიც და მათგან ერთ ერთმა 9 ამოხსნილი ამოცანით ფინალის საგზური მოიპოვა. თბილისის სახელმწიფო უნივერსიტეტის გუნდი Brontozavri, რომლის შემადგენლობაშიც ელდარ ბოგდანოვი, ლევან ვარამაშვილი და ირაკლი მერაბიშვილი არიან, დასწრებულ ფინალურ რაუნდზეა მიწვეული.

როგორც წინა სიახლეებში ვიუწყებოდით, ამჟამად ნიკა ჯიმშელეიშვილი იმყოფება ფლორიდის ქალაქ ფორტ ლაუდერდეილში და TopCoder Open 2011 ჩემპიონატის ფინალისთვის ემზადება, რომელიც ჩვენი დროით დღეს, 28 სექტემბერს, 9 საათზე დაიწყება. უნდა აღინიშნოს, რომ მრავალი წლის განმავლობაში TopCoder Open-ის ტურნირის ”ალგორითმების” შეჯიბრის ფინალში პირველად არის ქართველი მონაწილე.

გუშინ ჩატარდა ორივე ნახევარფინალი და ასევე wildcard რაუნდი ”ალგორითმების” შეჯიბრში. საბოლოო ფინალისტების სია კი ასე გამოიყურება: http://community.topcoder.com/tco11/algorithm/algorithm-advancers-bracket

შეჯიბრებას შეგიძლიათ თვალი ადევნოთ Live stream-ის საშუალებით, რომელიც ტოპკოდერის საიტზე გამოქვეყნდება: http://community.topcoder.com/tc

ხოლო, მათთვის ვინც რეგისტრირებულია საიტზე და აქვს ტოპკოდერის არენის აპლიკაცია, შესაძლებელია მოვლენების ყურება არენიდან, სადაც live რეჟიმში ჩანს თუ როდის აკომპილირებს ან გზავნის მონაწილე ამოცანის ამოხსნას.

Update: ფინალი დასრულდა :) ნიკამ კი მესამე ადგილი მოიპოვა. ვულოცავთ მას ამ წარმატებას :)

Russian Code Cup–ის შესახებ ინფორმაცია ინტერნეტში მიმდინარე წლის გაზაფხულზე გამოჩნდა. მის მთავარ საიტზე ყურადღებას თავიდანვე იქცევდა არც თუ ისე მცირე საპრიზო თანხები პირველი 3 ადგილისთვის. თუმცა, თავიდანვე არ იყო ნათელი შეეძლოთ თუ არა მასში მონაწილეობის მიღება სხვა ქვეყნის მოქალაქეებს.

ანალოგიური ინდივიდუალური შეჯიბრებების მსგავსად (TopCoder Open, Google Code Jam), აქაც ტარდებოდა შესარჩევი ინტერნეტ რაუნდები და გამარჯვებულებს იწვევდნენ მოსკოვში დასწრებულ ტურზე (მგზავრობის და იქ ცხოვრების სრული დაფინანსებით). მონაწილეობა შეეძლო ყველა მსურველს, რომლის ასაკიც არანაკლებ 18 წელი იყო.

3 საკვალიფიკაციო ეტაპიდან 600 მონაწილე გადიოდა ძირითად შესარჩევ ტურში. მათ შორის რამდენიმე ქართველი მონაწილეც აღმოჩნდა. მათ უკვე გაინაღდეს სამახსოვრო მაისური, თუმცა ფინალში საკმაოდ ბევრი, 50 მონაწილე გადიოდა და იქ მოხვედრის შანსი საკმაოდ კარგი იყო.

შეჯიბრების ამოცანებს ამ საქმის ცნობილი ექსპერტები ადგენდნენ პეტერბურგის უნივერსიტეტიდან, ანდრეი სტანკევიჩის მეთაურობით. პირობები რუსულ ენაზე იყო, რამაც განაპირობა ის, რომ შეჯიბრების მონაწილეები მხოლოდ რუსულენოვანი ქვეყნებიდან იყვნენ და შესაბამისად კონკურენციაც ოდნავ დაბალი იყო ვიდრე ინგლისურენოვან შეჯიბრებებზეა, თუმცა ეს შესამჩნევი აღარ იყო ფინალში, სადაც ძალიან ძლიერმა შემადგენლობამ მოიყარა თავი.

ამ წლის გაზაფხულზე ორი დიდი ჩემპიონატის დასაწყისი ვნახეთ. მარტში Topcoder Open-ის, ხოლო მაისში რუსეთის ღია ჩემპიონატის პირველი საკვალიფიკაციო რაუნდები ჩატარდა. აღნიშნულ შეჯიბრებებზე მსოფლიოს მრავალი ქვეყნის ძლიერი პროგრამისტები იღებენ მონაწილეობას და მათი რაოდენობა ყოველ წელს მნიშვნელოვნად იზრდება. ფინალისტებს შორის არის ქართველი მონაწილეც - ნიკა ჯიმშელეიშვილი, რომელიც TCO 2011-ის ფინალზე ფლორიდაში გაემგზავრება. საბოლოო შეჯიბრებამდე მხოლოდ 11 დღე დარჩა. მანამდე კი ის 18 სექტემბერს დაგეგმილ რუსეთის ღია ჩემპიონატის ფინალშიც იასპარეზებს.

Topcoder Open 2011-ის ფინალისტების სიის სანახავად ამ ბმულს მიჰყევით. ხოლო რუსეთის ჩემპიონატის ფინალში დაწინაურებული ქვეყნების სია ამ ბმულზეა.

მხარი დავუჭიროთ ნიკას და ვუსურვოთ წარმატებები :)

დღეს გაიმართა ჯეოლიმპის ბონუს II ეპიზოდი, რომლის ამოცანების ავტორები არიან ლევან ვარამაშვილი (A,B,D), ზურა ისაკაძე (E) და ელდარ ბოგდანოვი (C).

დიდ მადლობას ვუხდით ორგანიზატორებს საინტერესო შეჯიბრისთვის :)

გამარჯვებულები არიან:

სრული შედეგები შეგიძლიათ იხილოთ ამ ბმულზე.