ე. პანკრატიევის სახელობის ღია თასი წელიწადში ორჯერ ტარდება და რამდენიმე გუნდური შეჯიბრებისგან შედგება. ამ გაზაფხულის სერიის დასკვნითი რაუნდი დღეს ჩატარდა.

საერთო შედეგებში 600 გუნდიდან თბილისის გუნდი 35-ე ადგილზე გავიდა, ხოლო კავკასიაში ეს გუნდი პირველ ადგილს იკავებს:

1. Tbilisi SU Epic Losers. გუნდის შემადგენლობაში ელდარ ბოგდანოვი, ირაკლი მერაბიშვილი და გიორგი საღინაძე არიან.
კავკასიის რეგიონში მეორე და მესამე ადგილები ასევე ქართულ გუნდებს ეკუთვნით:
2. Tbilisi SU #1 - სეზონის ძირითადი ნაწილი გუნდმა იასპარეზა შემადგენლობით: ნოდარ ამბროლაძე, გიორგი შავგულიძე, ზურა ისაკაძე.
3. Tbilisi FreeUni ADA - ხატია ჭითაშვილი, მარიამ დანელია, დათა ლაპიაშვილი

აღსანიშნავია მთელი სეზონის მანძილზე ქართული გუნდების მობილიზება და მაღალი შედეგები. მეხუთე ადგილი თავისუფალი უნივერსიტეტის კიდევ ერთ გუნდს ერგო. საგანმანათლებლო ცენტრ "მზიურის" ორი მოსწავლეთა გუნდი მე-7 და მე-8 ადგილებზე განლაგდა, ქუთაისის მოსწავლეთა გუნდი მე-9 ადგილზე, ხოლო ქუთაისის აკაკი წერეთლის სახელმწიფო უნივერსიტეტის პირველი გუნდი მე-10 ადგილს იკავებს. პირველ 20-ეულში სულ 16 ქართული გუნდი მოხვდა.

სრული შედეგები შეგიძლიათ ამ ბმულზე იხილოთ.

29 აპრილი – 2 მაისის შუალედში თბილისში ტარდებოდა აკადემიკოს ილია ვეკუას ხსოვნისადმი მიძღვნილი საერთაშორისო ოლიმპიადა პროგრამირებაში. ეს ღონისძიება ყოველწლიურად ტარდება და წელს უკვე მეხუთედ გაიმართა. ოლიმპიადა პარალელურად მოსკოვში, ნოვოსიბირსკში, სანქტ–პეტერბურგში და თბილისში ტარდებოდა, ჩვენს ქალაქში მას უმასპინძლა საქართველოს ტექნიკურმა უნივერსიტეტმა.

ოლიმპიადის გუნდური შეჯიბრი 30 აპრილს გაიმართა. მიუხედავად იმისა, რომ ამოცანათა კომპლექტი ძალიან საინტერესო იყო, ის ამავდროულად არაადექვატურად რთული გამოდგა თბილისში მოასპარეზე გუნდებისთვის: 29 მონაწილე გუნდიდან მხოლოდ 11–მა მოახერხა ერთი მაინც ამოცანის ამოხსნა. შევაქებ ყველას, ვინც ეს მოახერხა, ხოლო დანარჩენებს ვეტყვი, რომ გული არ გაიტეხონ: ასეთ რთულ ამოცანათა კომპლექტს მსოფლიო ჩემპიონატის ფინალშიც კი არ სთავაზობენ მონაწილეებს. ასევე იმედს გამოვთქვამ, რომ მომავალში ანალოგიური ღონისძიებების მომზადებისას მხედველობაში მიღებული იქნება ქართული გუნდების საშუალოდ მცირე გამოცდილება და მათ მიეცემათ საშუალება, თავიანთი შესაძლებლობები გამოავლინონ და ერთმანეთს შეეჯიბრონ.

29 აპრილიდან 2 მაისამდე ჩათვლით საქართველოს ტექნიკურ უნივერსიტეტში ტარდება საერთაშორისო ოლიმპიადა პროგრამირებაში - ილია ვეკუას V თასი.

ოლიმპიადა ეძღვნება გამოჩენილი ქართველი მათემატიკოსისა და საზოგადო მოღვაწის, ილია ვეკუას ხსოვნას. 30 აპრილს ჩატარდება გუნდური შეჯიბრება, ხოლო 1 მაისს კი პირადი.